काठमाण्डौं । फ्राइडे रिलिज अन्तर्गत यो शुक्रबार प्रदर्शनमा तीन नेपाली फिल्म भैरे, चक्कर र पण्डित बाजेको लौरी प्रदर्शनमा आएका छन्।
भैरेमा अभिनेता दया हाङ राई, सुरक्षा पन्त, वर्षा सिवाकोटी र बुद्दी तामाङको मुख्य अभिनय छ। नेपालय सिनेमा इन्टरनेशनलको ब्यानरमा बनेको फिल्ममा कमेडी, एक्सन र रोमान्स समेटिएका छन्। एभरेस्ट सुर्य बोहराको लेखन तथा निर्देशन रहेको फिल्मलाई प्रेमप्रसाद पौडेल र देवीमाया अधिकारीले निर्माण गरेका हुन्।
फिल्ममा कविराज गहतराज,बसन्त श्रेष्ठ, रामजी लामिछानेको कोरियोग्राफी, पुरुषोत्तम प्रधानको छायाँकन, बसन्त सापकोटा, यम बराल, अर्जुन पोखरेलको संगीत, सुर्य थोकरको एक्सन र वनिष शाहको सम्पादन रहेको छ।
त्यसैगरी, दीपक ओली निर्देशित पण्डित बाजेको लौरीमा भने पश्चिम नेपालको बादी समुदायको पेसा, सामाजिक अवस्था र अस्तित्वको संघर्षको कथा प्रस्तुत गरिएको छ । फिल्ममा प्रवीण खतिवडा, सन्ध्या केसी, भोला सापकोटा, विजय बराल, लोकेन्द्र लेखक, मरिश्का पोखरेल, प्रमोद अग्रहरीलगायत कलाकारले अभिनय गरेका छन् । थमन भण्डारी र किशोर खड्का निर्माता रहेको फिल्मको बुधबार एफक्यू सिनेमामा प्रिमियर गरिएको थियो । प्रिमियरमा फिल्मले तारिफ पाएको छ ।
फिल्म चक्करमा भने कलाकारहरु सिर्जना सुब्बा, अर्पण थापा, अभोनराज उप्रेती, ऋचा शर्मा, भोलाराज सापकोटा, स्मृति पोखरेल लगायतको अभिनय छ। अनुष्का रौनियारको निर्देशन तथा लेखनमा फिल्म बनेको छ।
