नेपाली काँग्रेस आबद्ध नेपाली जनसम्पर्क समिति पोर्तुगलको १२ बर्षे इतिहासमा पहिलोपटक सिन्डिकेट तोड्दै निर्वाचन प्रकृयाद्वारा बिनोद घिमिरे भारी मतले बिजयी हुँदै पहिलो निर्वाचित अध्यक्ष बनेका छन् ।
हिजो सम्पन्न चुनावको मत परिणाम निर्वाचन समितिले मतगणना पश्चात् आज बिहान मात्रै घोषणा गरेको हो । घिमिरेले ८४९ मत ल्याउँदा उनका प्रतिस्पर्धी राजकुमार गौतमले १४३ मत मात्र प्राप्त गर्न सके । घिमिरे यस अघि समितिका महामन्त्री र गौतम सल्लाहकार थिए ।
यसैगरी समितिको महामन्त्रीमा पुरुषोत्तम सुबेदी (दामोदर) ६२२ मत प्राप्त गरी बिजयी भएका छन् । उनका प्रतिस्पर्धी जयभद्र सापकोटा ३२५ मतमा नै सिमित भए ।
निर्वाचित तीन उपाध्यक्षमा वकिल केसी (६८५), नवीन आचार्य (४०९) र रमेश कडेल (४०६) रहेका छन् । सहमहामन्त्री, कोषाध्यक्ष, सह कोषाध्यक्ष लगायत सदस्यहरु यस अघि नै निर्बिरोध निर्वाचित भइसकेको निर्वाचन समितिका संयोजक अशोक घिमिरेले जानकारी दिएका छन् ।
फोटो : शम्भु सिलवाल
