काठमाडौंः वैदेशिक रोजगारीमा विभिन्न मुलकमा रहेका नेपालीले खोलेको माउण्ट एभरेष्ट सेवा समाज नेपालले सुलेमान शंकर ‘इकु’ले सञ्चालन गरेको स्नेह बालआश्रमलाई ५१ हजार रुपैंया आर्थिक सहयोग गरेको छ । काठमाडौंको मूलपानीमा अवस्थित बालआश्रमको भवन निर्माणका लागि माउण्ट एभरेष्टले उक्त सहयोग गरेको हो ।
संस्थाकी उपाध्यक्ष शोमा क्षेत्री, कोषाध्यक्ष प्रमिला भेटवाल, सदस्य देवी खनाल कानुनी सल्लाहकार देवेन्द्र बुढाथोकी र प्रभा पण्डितले उक्त नगद संयुक्तरुपमा शुलेमान शंकरलाई हस्तान्तरण गरे ।
त्यही अवसरमा माउण्ट एभरेष्टले आश्रित बालबालिकालाई स्टेसनरी र न्यानो कपडा प्रदान गर्दै बिहानको खाना र खाजा पनि खुवाएको थियो । भूकम्पपीडित बालबालिकालाई स्नेह आश्रमले आश्रय दिएको छ ।
आश्रमका अध्यक्ष सुलेमान शंकरले माउण्ट एभरेष्ट परिवारलाई सहयोगको लागि धन्यवाद प्रकट गरेका छन् । हाल आश्रमको भवन नभएकाले समस्या भएको बताउँदै इकुले उक्त नगद भवन बनाउन सदुपयोग गर्ने बताए । कलाकारिताबाट कमाएको रकमले बालबलिका पालिरहेको बताउँदै उनले सबैमा सहयोगको अपिल पनि गरेका छन् ।
माउण्ट एभरेष्टकी उपाध्यक्ष शोभा क्षेत्रीले सामाजिक कामको लागि माउण्ट एभरेस्ट क्रियाशील रहेको बताइन् । संस्थाका पदाधीकारीबाट सहयोग संकलन गरेर सहयोग गरेको बताउँदै उनले सामाजिक कामलाई संस्थाले निरन्तरता दिने बताइन् ।
